Coma onte, hoxe e sempre, quen xoga (segundo os expertos) é máis
creativo e sociable. A sorpresa, a fantasía, a capacidade para crear e recrear
mundos, obxectos e personaxes, o descubrimento de sentimentos e sensacións na
relación cos outros, o poder inventar o presente e o futuro, forman parte do xogo. Pero, a que xogan os
nenos e as nenas de hoxe? Deixan os “robóticos” xoguetes modernos lugar para a
creatividade e a imaxinación? Unha
historia con pau retrocede no tempo para mostrarnos o máxico encanto do pau dunha
vasoira, un pau que pode ser un cabalo, unha espada, unha frauta … mesmo unha buxaina, por que non? Unha
homenaxe ás mentes emprendedoras, aos nenos e nenas de 3 a 100 anos (ou máis)
que manteñen a habilidade de tecer os seus soños cos fíos da perseveranza.
Teatro dentro do teatro, xogando a un xogo xa xogado, mentres uns Peter Pan adultos nos amosan como cambiar, reinventar, transformar, renovar, modificar... o noso mundo a cada intre.
